余德丞突然宣布离巢　竟然关阿妈点灯续命事！
上位小生余德丞喺早前播出嘅TVB剧集《青春不要脸》入面，表现优秀而获赞，最近更入围“全球百大帅哥2022”，估唔到佢喺今日凌晨，上载新片到个人Channel突然宣布离巢，约满TVB结束8年宾主情！片中佢除咗剖白心声，又向TVB讲Bye Bye，拍低自己执包袱全程，亦有指佢将极速开新工，同观众见面，而离巢原因就唔关健康事，亦系考虑咗好耐先决定走人。
片中佢先清理个人储物柜，柜内贴住佢转做艺员后第一次影嘅靓仔相，同初期主持儿童节目《Think Big》时小朋友送嘅圣诞卡等。片中佢提到自己喺TVB嘅回忆及感受，仲自嘲冇代表作：“喺TVB时做过奥运、讲波；又拍饮食及旅游节目，又拍过剧，最后系《青春不要脸》，8年冇白过，虽然冇代表作，但咩都试过，至少尽心尽力做过。”
不过话峰一转，佢就重提2018年因踢足球引发心脏出事昏迷入院，当中更因家人被牵连入报道之中，至今仍耿耿于怀：“当时有个人出嚟话我阿妈去跪佢帮我免费点灯续命，但根本我同妈咪唔识呢个人，我哋识嘅人都冇人去搵过佢，我当时好想企出嚟，但公司认为最好嘅回应就系唔回应，最后更只系叫我答：‘多谢关心，我没有回应。’我唔明点解要咁，系啱就啱；系错就错，但依家咁回应，咪令其他人更多揣测，有冇谂过咁嘅决定会有影响，仲会伸延落去，以后人哋谂起我都谂起呢件事。我自己做呢行冇所谓，但我妈咪出到去人哋会点谂佢，咁系伤害一个唔系呢行嘅人。到依家我仲可以坐喺度，好多人就觉得系因为我妈咪去点灯续命。”即令网友不禁揣测呢个可能系佢离巢主因！
TVB高层乐易玲亦有就余德丞离巢一事，喺社交网发表感受，坦言好理解对方决定并送上祝福，佢写道：“Dickson年多前同我讲过，32岁系男人嘅黄金岁月，好想往外闯，给自己摸索一下外面的世界，对公司讲虽然可惜，但我作为佢嘅长辈很能理解…出去走一圈，偿心愿…”佢透露因自己仍在隔离中，所以上星期Dickson返TVB办理手续时，错过了同对方坐低饮杯咖啡嘅机会，佢又祝对方一切顺利同埋身体健康。